【2023-2024年度 #黃大仙區巴士路線計劃】
［新增路線 29 特快往來鑽石山及觀塘］
喺本年度嘅巴士路線計劃（下稱「計劃」）中，運輸署建議新增一條由鑽石山綜合發展區開往觀塘碼頭嘅特快路線，並命名為29號線，只於平日繁忙時間提供單向服務。
運輸署表示，因應九龍東的逐步發展和轉型為香港的第二個核心商業區，遂建議新增特快巴士路線29號線，途經觀塘繞道 ，往來鑽石山及觀塘碼頭。與一般人理解鑽石山為位於荷里活廣場嘅鑽石山站總站唔同，計劃中嘅29號線將由用以取代位於四美街嘅新蒲崗公共交通總站，位於彩虹道采頤花園對面嘅鑽石山綜合發展區公共運輸交匯處開出，後依照29M之走線，經大有街及爵祿街前往太子道東及觀塘繞道，到達觀塘後會先繞經偉業街及海濱道等商廈方返回觀塘碼頭總站，回程途經之地區相若，唯因道路設計所限，本線返回太子道東後會改經啟新道、七寶街、六合街及四美街前往鑽石山綜合發展區公共運輸交匯處，走線與未改路前之A23線相若。
班次方面，運輸署建議本線只於平日星期一至五提供服務，星期六、日及公眾假期不設服務。服務時間為早上8點15分由鑽石山綜合發展區公共運輸交匯處開出往觀塘碼頭，以及傍晚6點15分由觀塘碼頭開往鑽石山綜合發展區公共運輸交匯處。用車將為一部單層巴士，全程收費為$7.3。
詳細走線請參閱附圖。
敝專頁樂見巴士公司及署方積極探討開辦更多本區對外特快通勤服務嘅可行性，唯單就本線而言，敝專頁對於本線之成效，以及能否如運輸署所指，能夠為乘客提供更快捷的服務存疑。由於鑽石山綜合發展區內嘅公營房屋發展尚未完成，本線現時能夠服務嘅住宅區唔多，大多僅限於采頤花園、啟鑽苑、及譽港灣一帶。而近觀塘一邊亦只能夠服務近觀塘碼頭及海濱道一帶嘅工商業機構，以目前情況而言客源實在有限，改以單層巴士行走又係唔係一個可以令本線持續有效地營運落去嘅有效方法？敝專頁對此實在有保留。
另外，本線雖然以途經觀塘繞道以圖繞過繁忙嘅觀塘道為賣點，但事實上繁忙時間嘅觀塘繞道嘅擠塞程度相比起觀塘道實在不遑多讓。上午繁忙時間有由東隧倒灌至觀塘繞道嘅車龍，下午繁忙時間亦有來自大老山隧道倒灌嘅車龍，以近年觀塘繞道嘅交通情況而言，本線「特快」嘅成效實在值得商榷。而且，如要由鑽石山前往觀塘繞道，就先需要繞經新蒲崗工業區內嘅較為狹小而且時有貨車停泊嘅道路，當中尤以六合街及四美街一段為甚，時有貨車於路邊上落貨以致巴士未能通行嘅情況出現。敝專頁單純喺地圖上量度，若依照計劃所示嘅走線行走，全程行車里數將超過8公里。但若沿觀塘道，經勵業街及偉業街前往觀塘，或直接由偉業街前往觀塘，行車里數亦只為4-5公里。事實上，即使觀塘道及偉業街交通同樣繁忙，但其實亦較觀塘繞道為佳。喺觀塘繞道嘅擠塞情況未能夠有效改善嘅情況下，敝專頁相信以此走線運作只會弄巧反拙，成效存疑。
敝專頁認為，巴士公司及署方願意研究開辦本區往來觀塘嘅特快通勤服務之本意為佳，唯本線之走線設計及能夠涉獵之服務範圍實在有待改善。與其勉強繞經幹線公路，並使用單層巴士以強行維持載客率，不妨考慮延長本線至鑽石山或富山等地，並改經其他前往觀塘而較少現行巴士服務途經之道路（如偉業街），以擴大本線之服務範圍，並為乘客提供一個較穩定嘅車程。
2023至2024年度黃大仙區巴士路線計劃經已推出，敝專頁將會逐一分析各項與本區相關嘅路線計劃，敬請密切留意敝專頁動態更新。各大仙街坊亦可以先行參閱敝專頁早前3月4日嘅拙文，以便先行知悉本年度嘅計劃摘要。如對本計劃內容有任何意見，亦歡迎喺度留言留低您嘅睇法。